شرح للسلة

سوري يا شباب إني هاغلس عليكم في القسم دا...

انا حبيت بس احط الاول شرح للباب...

ســــــــــــلـــــــــــــــة مهـــــــــــــــمــــــــــلات

أكيد في حياة كل واحد فينا سلات كتير

سلة للروحيات

سلة للإجتماعيات

سلة للعاطفيات

سلة للمهملات

سلة للمهمات

الفرق مابين السلتين الاخرانياتين حرفين اتنين

بس حرفين بيعملوا فرق شاااااااااسع ورهيب

سلة المهملات دي هي المكان اللي بنركن فيه كل (الحاجات) وسامحوني هاسميها بالإسم دا لغاية ما نتفق على إنها تكون في السلة ولا لأ

وسبب التسمية هي ان مافيش (.......) تتحط في السلة إلا الحاجات

يعني كل اللي في السلة بتاعتك يبقى حاجات ...

مش أشخاص

مش إله

مش أصدقاء

مش عيلة

لكن إسمها حاجات

ياريت نتناقش في الحاجات دي .. وهل مكانها الطبيعي السلة دي .. ولا مكانها متاخد لحاجة تاني؟

والحاجة التانية دي هي اللي مكانها السلة

عايزة اسمع أرائكم .. طبعاً بصراحة وبوضح .. وفي نفس الوقت من غير ما أغلس عليكم

إسمحولي أنا أبدأ بالتليفزيون

التليفزيون دا حاجة جميلة اوي

مسلية جداً

بصراحة مقدرشي استغنى عنها

لكن في مرة سمعت حاجة برجلتني اوي

طاسوني مريم في الكنيسة قالـتـلنا إن التليفزيون دا شيطان في البيت

تخيلوا؟؟؟ أبقى مقعد معايا شيطان في البيت

بقيت من نفسي محتار ... يا ترى أختار التليفزيون؟؟ ولا كلام طاسوني مريم؟؟

طاسوني مريم دي الخادمة بتاعتي .. واللي بثق في كلامها .. دا كلامها هو صوت ربنا ليا على الارض

بس التليفزيون مسلي .. وبعدين انا مش بقعد اتفرج على حاجات وحشة

إيه رأيكم .. أحط التليفزيون في سلة المهملات . ولا سلة المهمات؟؟؟

طـــيـــب أنا عايزة اعرف إيه هي الحاجات الحلوة إيه هي الحاجات الوحشة .. وليه طاسوني مريم بتقول إن التليفزيون دا شيطان في البيت؟؟

يعني هو يا باسم الاخبار والثقافة مش هاتيجي غير بالتليفزيون؟؟؟

وبعدين مافيش غير باسم ولا إيه؟

لأ طبعاً يا باسم .. انت الكل في الكل هنا

أنا بس نفسي اسمع رأي باقي الاعضاء

لأ طبعاً ياما حاجات كلها حلوة . وحاجات تاني كلها وحشة .. إيش عرفنا بقى ما يمكن التليفزيون دا يطلع من الحاجات الحلوة كلها .. أو من الحاجات الوحشة كلها؟؟

اللي اقصده بحاجات حلوة كلها وحاجات وحشة كلها اقصد عن الحاجات التانية

لكن تعليقي انا على التليفيزيون هاخليه لما يخلص الوقت بتاع الموضوع

اللي أنا مستغرباله ان مافيش حد تاني عاجبه الموضوع خالص

بس قبل ما اقفله حبيت اقولكم رأي طاسوني مريم .. بعد ما سألتها ليه شيطان في البيت ... كان رأيها كدا:

طاسوني: أكتر شيطان شغال دلوقتي ولسة ماتقطعش عيشه هو شيطان التأجيل وشيطان التجربة

أنا: مين دول .. أنا مسمعتش حد اسمه كدا قبل كدا..؟؟

طاسوني: شيطان التأجيل دا هو اللي يخليكي تأجلي .. بعد الفيلم دا ما يخلص .. بعد المسلسل .. بعد البرنامج .. طيب اشوف الاعلان دا وامشي.. وتفضل الحكاية دي دايرة دايرة ولا بتخلص ولا بتنتهي.. والساعة اللي كنتي هاتديها لربنا يضحك عليكي الشيطان وياخد 50 دقيقة منها .. وحتى لو فوقتي لنفسك يقولك إيه المشكلة .. ماإنتي كنتي بتتفرجي على برنامج روحي بردو .. ولا كنتي بتسمعي وعظة من أبونا فلان في التليفزيون.. بس طبعاً مش هودا اللي بيكون الواقع وبدل ما تبقى ساعة لربنا تبقى 10 دقايق دا إن اخدتيهم لربنا بتركيز وذهن صافي ..

أنا: لأيا طاسوني بردو .. مانا بدي وقتي لربنا كويس..!!

طاسوني: ياترى بتدي وقتك لربنا بتركيز؟؟ كل ذهنك بيبقى لربنا؟ ياريت نلاحظ اد ايه تأثير التليفزيون علينا

خلي بالك .. التليفزيون مش وحش ولا هو خطيه.. بس كل الاشياء تحل لي .. ولكن ليست كل الاشياء للبنيان.. يعني اللي مايبنيش مالوش لازمة عندي

دي خطوة كبيرة اوي اوي .. مش بسهولة اوصلها .. لكن الحاجة الكويسة اني ابتدي الاحظ تصرفاتي .. إيه اللي بيبني معايا وإيه اللي بيهدمني

انا: طيب ومين شيطان التجربة دا؟؟

طاسوني: شيطان التجربة دا حكايته حكاية .. يقولك جربي تشوفي البرنامج دا .. ولا تشوفي القناة دي .. وتفضلي تجربي . وتجربي . لغاية ما تيجي في يوم مانتيش قادرة تبطلي الحاجة اللي في يوم من الايام جربتيها وتفضل الحكاية معاكي ومانتيش قادرة تبطليها لدرجة انها تبقى مش بس بتئذيكي في الحاجة دي بس .. لكن كمان تفضل تضايقك في حاجات تانية كتير .. أنا مش بكلمك على القناوت اللي مش كويسة بتاعت الفضائيات .. كفاية انك تتفرجي على فيلم .. او مسلسل .. وتشوفي مثلاً شكل لبس معين .. يخليكي تفكري ايه الكلاكيع اللي انا لابساها دي .. او شكل عيشة معينة يخليكي تتذمري على حياتك انتي.. أو تشوفي اغنية تعلق في ذهنك مكان ترنيمة كنتي بتقوليها...

وفي الآخر أحب اقولك ... خلي بالك .. التلفيزيون أداة كويسة جداً .. بس نخلي بالنا .. لأنه أداة سهلة اوي في ايد الشيطان..